喺噉嘅情形下，两个人眼神一对，同时跳起身，翻过二楼嘅栏杆，跳落一楼中间嘅戏台上，陆小王爷喺前头开路，范冰就跟喺后尾，拎住条裙，两个人一阵风咁就跑唔见咗。

陆小王爷先扶范冰上咗马车，先至讲：“啲咩人嚟嘅……真系……”

佢毕竟有啲涵养，揺咗一阵个脑都谂唔到啲咩闹人嘅说话。范冰拉开窗帘，桃儿杏儿都跟埋嚟，个样都系难以形容。

而家虽然走得出，但係去边度又变咗个问题。

陆小王爷话：“我早就谂好喇，我有个师兄喺大相国寺出家，我哋上去稳佢，顺便仲可以问吓佢嘅意见。”

“大相国寺……咁你嘅……”范冰指住车上嘅食盒，入面嘅肉味几浓嘅。

“冇嘢冇嘢，我师兄唔守斋嘅，我哋咁样去佢仲开心。”

大相国寺度有唔守斋嘅和尚……范冰一脸疑惑，但都唔失为一个好办法，即刻点头答应，之后又吩咗桃儿入宫帮陈雨琴揾两位经验最丰富嘅嬷嬷嚟，之后马车调转方向，去大相国寺。

范冰佢哋走咗，但光明嘅主角韦雪峰同陈雨琴就未走。

佢哋两个本来系嚟吉祥居食饭嘅，而家范冰佢哋走咗，韦雪峰佢哋就要继续喺度品尝美食。都唔知佢哋面皮系边度嚟，可以喺咁嘅情况下若无其事咁食嘢。

不过酒楼嚟嘅，开门做生意，嚟嘅都系客，都唔可以赶人走，于是安排咗位，小二斟茶倒水递上菜单，两个人拣咗好耐，点咗满满一檯餸。

吉祥居嘅其他客人都系一边交头接耳，一边指住韦雪峰同陈雨琴议论。

不过佢哋两个都唔理，好似冇嘢发生咁，真系令人佩服佢哋嘅厚面皮。

反而吉祥居嘅掌柜觉得前景黯淡：一次过得罪咗公主同小王爷，虽然同佢哋铺头冇乜关系，但件事究竟系佢哋吉祥居度发生嘅，万一日后公主同小王爷谂番起呢件事，要嚟整蛊佢点算？

掌柜度谂紧点样送礼消灾嘅嘢暂时唔提，呢边韦雪峰同陈雨琴已经食到肚满肠肥。

要承认，喺京城噉嘅地方打出名堂，经久不衰嘅馆子，上嘅餸肯定色香味形样样齐全，甚至可以媲美皇宫嘅御厨。

陈雨琴喺海边长大，岛上面淡水资源稀缺，平时食嘅多系啲晒干嘅咸鱼、晒干嘅贝壳类嘢。

哩啲嘢如果整得好自然好味，但岛上对呢啲嘢唔讲究，加上比起好味更注重长时期保存同填饱肚，所以冇人理味道。

咁好味、色彩缤纷、造型精致嘅餸，陈雨琴系第一次食。

佢仲有啲想喊，如果冇遇到韦雪峰，跟住佢离开海岛，宜家可能仲喺屋企食咸鱼，果然韦雪峰就系佢嘅海神。

讲到封建迷信嘅思想唔得嘅原因就系咁，陈雨琴成日谂住韦雪峰系海神，同时觉得自己系俾海神拣中嘅圣女，佢梗系睇唔起公主——乜嘢公主，咪都系未嫁俾海神大人啰？

唔知范冰会对陈雨琴嘅谂法有乜嘢感觉，总之唔会系好嘅感觉。

韦雪峰以前都冇咩机会嚟吉祥居食饭。嗰阵时端宝宝住喺宫度，好少可以出宫，韦雪峰自己官仔细，薪水少，韦家又唔系乜嘢大户人家，佢根本去唔起吉祥居噉嘅大馆子。

加上佢平时人缘差，人哋食饭都唔愿意叫佢，韦雪峰唯有自己揾啲细馆子，食几味小菜，大菜佢都唔舍得食。

宜家佢生还返嚟，唔单止重获官职，仲拥有咗韦家，仲有咁一个随时可以攞夜明珠嘅富贵老婆，随时都可以食得起吉祥居，韦雪峰都觉得佢要感动到喊，果然陈雨琴就系佢嘅幸运女神，自从同陈雨琴一齐之后，所有嘢都顺顺利利。

两个人谂到一齐，对望住对方，深情款款。

“琴儿……”韦雪峰对陈雨琴嘅称呼更加甜咗，“等阵我哋结咗账，我带你去湖上面睇灯笼好唔好呀？”

“好嘅！”陈雨琴笑到嘴角翘到好高，佢对坐船唔稀奇，但係对花灯，佢就好有兴趣，即刻拍咗下台：“小二，埋单！”

小二急急脚行过来，笑到见牙唔见眼：“两位总共消费咗九百一十两三分。三分唔计，一共系九百一十两。”

“冇问题。”陈雨琴讲住就伸手入腰间嘅荷包攞银票，但系一伸手，佢个样即刻变咗。

因为佢嘅荷包竟然唔见咗。